ఏలూరు, పశ్చిమ వాహిని, మే 04: ఏలూరు జిల్లా పోలీస్ ప్రధాన కార్యాలయంలోని కాన్ఫరెన్స్ హాల్లో సోమవారం ప్రజల సమస్యల పరిష్కార వేదిక కార్యక్రమాన్ని జిల్లా ఎస్పీ కె. ప్రతాప్ శివ కిషోర్, ఐపీఎస్ నిర్వహించారు. ప్రజల సమస్యలను త్వరితగతిన, పారదర్శకంగా పరిష్కరించడం లక్ష్యంగా నిర్వహించిన ఈ కార్యక్రమంలో అదనపు ఎస్పీ (ఏఆర్) జి. మునిరాజాతో కలిసి ఎస్పీ స్వయంగా ఫిర్యాదుదారుల నుండి అర్జీలను స్వీకరించారు.
ఈ పబ్లిక్ గ్రీవెన్స్ కార్యక్రమం పూర్తిగా పేపర్లెస్ విధానంలో, ఆన్లైన్ వ్యవస్థ ద్వారా పారదర్శకంగా నిర్వహించడం ప్రత్యేకతగా నిలిచింది. మొత్తం 39 ఫిర్యాదులు అందగా, వాటిలో భూ వివాదాలు, కుటుంబ తగాదాలు, ఆర్థిక మోసాలకు సంబంధించిన కేసులు ఎక్కువగా నమోదయ్యాయి. ఎస్పీ ప్రతి ఫిర్యాదుదారుతో నేరుగా మాట్లాడి వారి సమస్యలను విని, సంబంధిత అధికారులకు చట్టప్రకారం వెంటనే విచారణ చేపట్టి నివేదికలు సమర్పించాలని కఠిన ఆదేశాలు జారీ చేశారు.
ప్రజలు తమ సమస్యల పరిష్కారం కోసం తప్పనిసరిగా జిల్లా కార్యాలయానికి రావాల్సిన అవసరం లేదని ఎస్పీ తెలిపారు. సమీపంలోని సబ్-డివిజన్ లేదా సర్కిల్ కార్యాలయాల్లోనే ఫిర్యాదులు ఇవ్వవచ్చని సూచించారు. అలాగే **meekosam.ap.gov.in** వెబ్సైట్ ద్వారా ఆన్లైన్లో ఫిర్యాదులు నమోదు చేసుకోవచ్చని, 1100 టోల్-ఫ్రీ నంబర్ ద్వారా ఫిర్యాదుల స్థితిగతులను తెలుసుకోవచ్చని వివరించారు.
జిల్లా నలుమూలల నుండి వచ్చిన ఫిర్యాదుదారుల కోసం ఏలూరు శ్రీ సత్యసాయి ట్రస్ట్ వారు భోజన సదుపాయాలు ఏర్పాటు చేయడం విశేషం. ప్రజలకు మెరుగైన సేవలు అందించడంలో పోలీస్ శాఖ కట్టుబడి ఉందని, ప్రతి సమస్యకు సమర్థవంతమైన పరిష్కారం అందించేందుకు చర్యలు తీసుకుంటున్నామని అధికారులు తెలిపారు.
_11zon.png)
