ఏలూరు, పశ్చిమ వాహిని, ఏప్రిల్ 05: ఏలూరు జిల్లా ఉంగుటూరు మండలం నాచుగుంట గ్రామంలోని జి.వి.ఆర్ బయో ఇన్పుట్స్ రిసోర్స్ సెంటరులో ఆదివారం PMDS (నవధాన్యాలు) కిట్ల తయారీ కార్యక్రమం ఘనంగా నిర్వహించారు. ఈ కార్యక్రమంలో భాగంగా తొలి విడతలోనే 1500 కిట్లను సిద్ధం చేశారు.
ప్రతి కిట్లో 22 రకాల విత్తనాలు ఉండగా, ఒక్క కిట్ను రూ.900కు రైతులకు అందిస్తున్నారు. ఈ కిట్లు ప్రకృతి వ్యవసాయాన్ని ప్రోత్సహించే దిశగా రూపొందించబడినవని నిర్వాహకులు తెలిపారు.
ఈ కార్యక్రమానికి జిల్లా ప్రాజెక్టు మేనేజర్ బి. వెంకటేష్ హాజరై తయారీ ప్రక్రియను పర్యవేక్షించారు. మండల ఏపీసీఎన్ఎఫ్ బృందం సభ్యులు కూడా పాల్గొని కార్యక్రమాన్ని విజయవంతం చేశారు. నాచుగుంటలోని స్వర్ణ హాలిక ఎఫ్పీసీ ఆవరణలో ఈ కిట్ల తయారీ జరిగింది.
ఈ PMDS కిట్లు నేల ఎర్రదనాన్ని తగ్గించడం, సంవత్సరమంతా పచ్చదనాన్ని నిలుపుకోవడం, కలుపు మొక్కల నియంత్రణ, నేలలో కార్బన్ శాతం పెంపు వంటి అనేక ప్రయోజనాలను అందిస్తాయి. అలాగే పురుగులు, వ్యాధులను నియంత్రించడంలో కూడా సహాయపడతాయి.
అదనంగా, సూక్ష్మజీవుల కార్యకలాపాలను పెంచి, నీటి నిల్వ సామర్థ్యాన్ని మెరుగుపరచడం, పశువులకు పోషక విలువలతో కూడిన పచ్చి మేతగా ఉపయోగపడటం వంటి ప్రయోజనాలు ఉన్నాయి. వానపాముల సంఖ్యను పెంచడంలో కూడా ఈ కిట్లు కీలక పాత్ర పోషిస్తాయి.
రసాయన పురుగుమందుల అవసరాన్ని తగ్గిస్తూ, పర్యావరణానికి మేలు చేయడంతో పాటు రైతులకు ఆర్థికంగా లాభదాయకంగా ఉండే ఈ కిట్లు ప్రకృతి వ్యవసాయ విస్తరణకు దోహదపడతాయని జిల్లా ప్రాజెక్టు మేనేజర్ పేర్కొన్నారు.
_11zon.png)
