ఏలూరు, పశ్చిమ వాహిని, ఏప్రిల్ 20: జిల్లా పోలీస్ ప్రధాన కార్యాలయంలో సోమవారం నిర్వహించిన “ప్రజల సమస్యల పరిష్కార వేదిక” కార్యక్రమంలో జిల్లా ఎస్పీ శ్రీ కె. ప్రతాప్ శివ కిషోర్, ఐపీఎస్ గారు ప్రజల నుంచి నేరుగా ఫిర్యాదులను స్వీకరించారు. ప్రజలకు సులభంగా, పారదర్శకంగా సేవలు అందించాలనే లక్ష్యంతో ఈ కార్యక్రమాన్ని నిర్వహించినట్లు ఎస్పీ తెలిపారు. ఈ సందర్భంగా ఏఆర్ అదనపు ఎస్పీ శ్రీ జి. మునిరాజా గారు కూడా పాల్గొన్నారు.
ఈ గ్రీవెన్స్ కార్యక్రమం పూర్తిగా పేపర్లెస్ విధానంలో, ఆన్లైన్ పద్ధతిలో నిర్వహించడం ప్రత్యేకతగా నిలిచింది. మొత్తం 38 ఫిర్యాదులు అందగా, వాటిలో భూ వివాదాలు, కుటుంబ తగాదాలు, ఆర్థిక మోసాలకు సంబంధించినవి అధికంగా ఉన్నట్లు అధికారులు వెల్లడించారు. ప్రతి ఫిర్యాదును శ్రద్ధగా స్వీకరించి నమోదు చేశారు.
ఎస్పీ గారు స్వయంగా ఫిర్యాదుదారులతో మాట్లాడి వారి సమస్యలను ఓపికగా విన్నారు. అందిన ఫిర్యాదులపై చట్టపరమైన విచారణను తక్షణమే ప్రారంభించి, సంబంధిత అధికారుల ద్వారా నివేదికలు సమర్పించాలని ఆదేశించారు. ప్రజలకు న్యాయం అందేలా కఠిన చర్యలు తీసుకుంటామని ఆయన హామీ ఇచ్చారు.
ప్రజలు తమ సమస్యల పరిష్కారం కోసం తప్పనిసరిగా జిల్లా కేంద్రానికి రావాల్సిన అవసరం లేదని ఎస్పీ తెలిపారు. సమీపంలోని సబ్-డివిజన్ లేదా సర్కిల్ కార్యాలయాల్లోనే ఫిర్యాదులు నమోదు చేసుకోవచ్చని సూచించారు. దీనివల్ల ప్రజల సమయం, ఖర్చు రెండూ ఆదా అవుతాయని పేర్కొన్నారు.
అదేవిధంగా meekosam.ap.gov.in వెబ్సైట్ ద్వారా కూడా ఫిర్యాదులు నమోదు చేసుకునే అవకాశం ఉందని వివరించారు. ఫిర్యాదుల స్థితిని తెలుసుకోవడానికి 1100 టోల్ ఫ్రీ నంబర్ను ఉపయోగించుకోవాలని ప్రజలకు సూచించారు. పోలీస్ శాఖ ఎల్లప్పుడూ ప్రజలకు అందుబాటులో ఉంటుందని, సమస్యల పరిష్కారానికి కట్టుబడి ఉంటుందని ఎస్పీ స్పష్టం చేశారు.
_11zon.png)
