లోక్‌సభలో రాజ్యాంగ సవరణ బిల్లు వీగింది – మహిళా రిజర్వేషన్, డీలిమిటేషన్ ప్రతిపాదనలకు తాత్కాలిక బ్రేక్

దిల్లీ, పశ్చిమ వాహిని, 17: లోక్‌సభలో కీలకమైన రాజ్యాంగ సవరణ బిల్లు ఓటింగ్‌లో విఫలమైంది. మొత్తం 528 మంది సభ్యులు ఓటింగ్‌లో పాల్గొనగా, 298 మంది అనుకూలంగా, 230 మంది వ్యతిరేకంగా ఓటు వేశారు. రాజ్యాంగ సవరణ బిల్లుకు అవసరమైన మూడింట రెండొంతుల మెజారిటీ (326 ఓట్లు) సాధించలేకపోవడంతో బిల్లు వీగిపోయిందని లోక్‌సభ స్పీకర్ ఓం బిర్లా ప్రకటించారు. దీంతో కేంద్ర ప్రభుత్వం ప్రతిష్ఠాత్మకంగా తీసుకున్న ఈ బిల్లు ఆమోదం పొందలేదు.

ఈ పరిణామాల నేపథ్యంలో కేంద్ర మంత్రి కిరణ్ రిజిజు, డీలిమిటేషన్ బిల్లు–2026 మరియు కేంద్ర పాలిత ప్రాంతాల చట్టాల బిల్లు–2026లను వెనక్కి తీసుకుంటున్నట్లు ప్రకటించారు. మహిళా రిజర్వేషన్ బిల్లు మరియు డీలిమిటేషన్ బిల్లును కేంద్ర ప్రభుత్వం అత్యంత ప్రాధాన్యతతో ముందుకు తీసుకువచ్చింది. అయితే విపక్షాల తీవ్ర వ్యతిరేకత కారణంగా ఈ బిల్లులు ముందుకు సాగలేకపోయాయి. దీంతో కేంద్రం ప్రతిపాదించిన లోక్‌సభ సీట్ల పెంపు (850 వరకు) ప్రణాళికకు తాత్కాలికంగా బ్రేక్ పడింది.

డివిజన్ ఓటింగ్ ద్వారా ఎంపీలు తమ అభిప్రాయాన్ని వెల్లడించారు. ఈ బిల్లు ఆమోదం పొందాలంటే కనీసం 352 ఓట్లు అవసరం కాగా, కేవలం 298 ఓట్లు మాత్రమే లభించాయి. వ్యతిరేకంగా 230 ఓట్లు నమోదవడంతో మ్యాజిక్ ఫిగర్‌కు మరో 54 ఓట్ల దూరంలో బిల్లు నిలిచిపోయింది. తొలి రౌండ్ ఓటింగ్‌లో కూడా బిల్లు మెజారిటీ సాధించలేకపోవడం గమనార్హం.

ఈ బిల్లుకు మద్దతు ఇవ్వాలని ప్రధాని నరేంద్ర మోదీ ముందుగా విపక్షాలకు లేఖ రాశారు. మహిళల సాధికారతకు ఇది చారిత్రాత్మక అడుగు అని పేర్కొంటూ అందరూ కలిసి చరిత్ర సృష్టించాలని పిలుపునిచ్చారు. ఓటింగ్‌కు ముందు సోషల్ మీడియా వేదికగా కూడా ఆయన ఇదే అభిప్రాయాన్ని వెల్లడించారు. దేశవ్యాప్తంగా మహిళలు ఈ నిర్ణయాన్ని ఆసక్తిగా గమనిస్తున్నారని తెలిపారు.

అయితే విపక్షాలు ఈ బిల్లుపై తీవ్ర అభ్యంతరం వ్యక్తం చేశాయి. కాంగ్రెస్ నాయకుడు రాహుల్ గాంధీ మాట్లాడుతూ, ఇది నిజమైన మహిళా బిల్లు కాదని, డీలిమిటేషన్‌తో ముడిపెట్టడం వల్ల రాజ్యాంగ విరుద్ధంగా మారిందని విమర్శించారు. మహిళా రిజర్వేషన్‌కు మేము వ్యతిరేకం కాదని, కానీ ఈ విధానం సరైనది కాదని స్పష్టం చేశారు. 2023 మహిళా బిల్లును అమలు చేస్తే పూర్తి సహకారం అందిస్తామని ఆయన తెలిపారు.

ప్రియాంకా గాంధీ కూడా ఇదే విధంగా స్పందిస్తూ, ప్రస్తుత రూపంలో బిల్లును ప్రవేశపెట్టడాన్ని వ్యతిరేకిస్తున్నామని చెప్పారు. తమిళనాడు ముఖ్యమంత్రి ఎం.కె. స్టాలిన్, ఈ ఫలితాన్ని ప్రజాస్వామ్య విజయంగా అభివర్ణించారు. తెలంగాణ సీఎం రేవంత్ రెడ్డి, రాహుల్ గాంధీ మరియు ఖర్గే నేతృత్వంలో విపక్షాలు జాతీయ స్థాయిలో పెద్ద ప్రమాదాన్ని అడ్డుకున్నాయని వ్యాఖ్యానించారు.

ఈ పరిణామం దేశ రాజకీయాల్లో కీలక మలుపుగా భావించబడుతోంది. మహిళా రిజర్వేషన్ అంశం మళ్లీ కొత్త రూపంలో ముందుకు వచ్చే అవకాశాలు ఉన్నాయని రాజకీయ వర్గాలు అంచనా వేస్తున్నాయి. కేంద్రం తదుపరి చర్యలపై దేశవ్యాప్తంగా ఆసక్తి నెలకొంది.