ఏలూరు, పశ్చిమ వాహిని, ఏప్రిల్ 24: ఏలూరు జిల్లా పోలీస్ శాఖ ఆధ్వర్యంలో గ్రామస్థాయిలో ప్రజలకు అవగాహన కల్పించే కార్యక్రమాలు కొనసాగుతున్నాయి. ఈ నేపథ్యంలో జిల్లా ఎస్పీ కె. ప్రతాప్ శివ కిషోర్, ఐపీఎస్ మార్గదర్శకత్వంలో, డీఎస్పీ డి. శ్రావణ్ కుమార్ ఆదేశాల మేరకు కైకలూరు రూరల్ ఇన్స్పెక్టర్ వి. రవికుమార్, కలిదిండి ఎస్ఐ పవన్ కుమార్ సిబ్బందితో కలిసి కలిదిండి మండలం సున్నంపూడి గ్రామంలో గ్రామసభ నిర్వహించారు. గ్రామస్థులతో నేరుగా చర్చిస్తూ పలు కీలక అంశాలపై అవగాహన కల్పించారు.
గ్రామసభలో ముఖ్యంగా అగ్నికుల క్షత్రియుల జీవనాధారమైన చేపల వేటకు సంబంధించిన సమస్యలు, భద్రతా జాగ్రత్తలు, ప్రభుత్వ పరిరక్షణ అంశాలపై చర్చించారు. ఇటీవల చేపల వేట ముగించుకుని ఇంటికి తిరిగి వస్తున్న సమయంలో జరిగిన రోడ్డు ప్రమాదంలో ముగ్గురు మృతి చెందిన ఘటనను ప్రస్తావిస్తూ, మత్స్యకారులు ప్రయాణ సమయంలో జాగ్రత్తగా ఉండాలని సూచించారు. వాహన భద్రతా నియమాలు పాటించడం, ఇన్సూరెన్స్ మరియు అవసరమైన రికార్డులు కలిగి ఉండడం ఎంతో ముఖ్యమని వివరించారు.
అదేవిధంగా నూతన క్రిమినల్ చట్టాలపై అవగాహన కల్పిస్తూ, మహిళలు మరియు బాలికల భద్రతపై ప్రత్యేక దృష్టి పెట్టాలని సూచించారు. సైబర్ నేరాలు పెరుగుతున్న నేపథ్యంలో ప్రజలు అప్రమత్తంగా ఉండాలని, మోసాలకు గురైతే వెంటనే 1930 నంబర్కు ఫిర్యాదు చేయాలని, అత్యవసర పరిస్థితుల్లో 112 ద్వారా పోలీసు సహాయం పొందవచ్చని తెలియజేశారు.
కొల్లేరు పరివాహక ప్రాంతంలో చెరువులు, కాలువలు అధికంగా ఉండటంతో వేసవి కాలంలో చిన్నారుల భద్రతపై తల్లిదండ్రులు ప్రత్యేక శ్రద్ధ తీసుకోవాలని సూచించారు. చేపల వేట సమయంలో కూడా తగిన భద్రతా ప్రమాణాలు పాటించాలని మత్స్యకారులకు అవగాహన కల్పించారు.
గ్రామీణ యువత పేకాట, కోడిపందాలు వంటి చెడు అలవాట్లకు దూరంగా ఉండి, తమ భవిష్యత్తుపై దృష్టి సారించాలని పోలీసు అధికారులు సూచించారు. ఉద్యోగ లక్ష్యాలతో ముందుకు సాగుతూ జాబ్ చార్ట్ రూపొందించుకోవాలని ప్రోత్సహించారు. విద్యార్థులు వేసవి సెలవులను సద్వినియోగం చేసుకుని చదువులపై దృష్టి పెట్టి, తమ ప్రతిభను పెంపొందించుకోవాలని సూచించారు.
ఈ కార్యక్రమం ద్వారా గ్రామస్థులకు నూతన చట్టాలు, సైబర్ భద్రత, ప్రమాద నివారణ చర్యలు, యువత మార్గదర్శకాలు వంటి పలు అంశాలపై సమగ్ర అవగాహన కల్పించబడింది. గ్రామ ప్రజలు పోలీసుల సూచనలను స్వాగతిస్తూ చురుకుగా పాల్గొన్నారు.
_11zon.png)
