ఏలూరు, పశ్చిమ వాహిని, ఏప్రిల్ 28: నగరంలో పెరుగుతున్న సైబర్ నేరాల నేపథ్యంలో బ్యాంకులు మరియు పోలీసుల మధ్య సమన్వయం ఎంతో అవసరమని ఏలూరు సబ్ డివిజన్ డీఎస్పీ డి. శ్రావణ్ కుమార్ పేర్కొన్నారు. జిల్లా ఎస్పీ కె. ప్రతాప్ శివ కిషోర్ ఆదేశాల మేరకు మంగళవారం నగరంలోని ప్రభుత్వ, ప్రైవేట్ బ్యాంకుల అధికారులతో ప్రత్యేక సమన్వయ సమావేశాన్ని నిర్వహించారు.
సైబర్ నేరగాళ్లు వినియోగిస్తున్న కొత్త పద్ధతులపై ఈ సమావేశంలో విస్తృతంగా చర్చించారు. ముఖ్యంగా ఫిషింగ్ లింకులు, ఫేక్ KYC అప్డేట్లు, లోన్ యాప్ల ద్వారా జరుగుతున్న మోసాలపై అప్రమత్తంగా ఉండాలని బ్యాంకు అధికారులకు సూచించారు. ప్రతి ఖాతాదారునికి సైబర్ భద్రతపై అవగాహన కల్పించడం బ్యాంకుల బాధ్యత అని స్పష్టం చేశారు.
బ్యాంకు ప్రాంగణాల్లో సైబర్ నేరాల నివారణకు సంబంధించిన పోస్టర్లు, హెల్ప్లైన్ నంబర్లను ప్రదర్శించాలని సూచించారు. అలాగే OTPలు, PIN నంబర్లు ఎవరికీ చెప్పకూడదని ఖాతాదారులకు తరచుగా తెలియజేయాలని పేర్కొన్నారు. అనుమానాస్పద లావాదేవీలు గుర్తించిన వెంటనే సంబంధిత ఖాతాలను తాత్కాలికంగా నిలిపివేసి, పోలీసులకు సమాచారం అందించాలన్నారు.
సైబర్ మోసాల విషయంలో తొలి 1–2 గంటలు అత్యంత కీలకమని డీఎస్పీ తెలిపారు. ఈ సమయంలో స్పందిస్తే బాధితుల డబ్బును తిరిగి పొందే అవకాశాలు ఎక్కువగా ఉంటాయని వివరించారు. మోసానికి గురైన వారు వెంటనే 1930 హెల్ప్లైన్కు కాల్ చేయడం లేదా అధికారిక వెబ్సైట్ ద్వారా ఫిర్యాదు చేయాలని సూచించారు.
సాంకేతికత అభివృద్ధి చెందుతున్న కొద్దీ నేరగాళ్ల పద్ధతులు కూడా మారుతున్నాయని, ఈ పరిస్థితుల్లో బ్యాంకులు మరియు పోలీసులు కలిసి పని చేసినప్పుడే ప్రజల సొమ్ముకు పూర్తి రక్షణ కల్పించగలమని డీఎస్పీ డి. శ్రావణ్ కుమార్ పేర్కొన్నారు. సమావేశంలో వివిధ బ్యాంకుల మేనేజర్లు, పోలీస్ సిబ్బంది పాల్గొన్నారు.
_11zon.png)
