జంగారెడ్డిగూడెం, పశ్చిమ వాహిని, ఫిబ్రవరి 12: దేశవ్యాప్త సార్వత్రిక సమ్మెకు మద్దతుగా జంగారెడ్డిగూడెంలో ఎల్ఐసి ఉద్యోగులు భారీగా ఆందోళన చేపట్టారు. జె. నరేంద్రబాబు అధ్యక్షతన నిర్వహించిన ఈ సమ్మెలో ఉద్యోగులు తమ డిమాండ్లను గట్టిగా వినిపించారు.
ఈ సమ్మెకు వివిధ కార్మిక, విద్యార్థి సంఘాలు సంఘీభావం ప్రకటించాయి. సంఘం జిల్లా ప్రధాన కార్యదర్శి ఎస్కే సుభాషిని, డివైఎఫ్ఐ జిల్లా ప్రధాన కార్యదర్శి జి. సూర్యకిరణ్ సుందరం తదితరులు పాల్గొని మద్దతు తెలిపారు. ఈ సందర్భంగా వారు మాట్లాడుతూ కేంద్ర, రాష్ట్ర ప్రభుత్వాల విధానాలను తీవ్రంగా విమర్శించారు.
ప్రభుత్వ రంగ సంస్థలైన రైల్వే, ఎల్ఐసి, పోస్టల్, బిఎస్ఎన్ఎల్, ప్రభుత్వ బ్యాంకులను దశలవారీగా ప్రైవేటీకరిస్తూ కార్మికులకు నష్టం కలిగిస్తున్నారని ఆరోపించారు. నాలుగు లేబర్ కోడ్స్ ద్వారా ఉద్యోగుల కనీస హక్కులను హరించడమే కాకుండా, యూనియన్లు ఏర్పాటు చేసుకునే హక్కును కూడా పరిమితం చేస్తున్నారని అన్నారు. కార్మికులకు కనీస వేతనాలు, భద్రతా ప్రయోజనాలు లేకుండా చేసే విధానాలను వెంటనే రద్దు చేయాలని డిమాండ్ చేశారు.
ఉద్యోగులు తమ హక్కుల కోసం రోడ్డెక్కితే అడ్డంకులు సృష్టిస్తున్నారని, అయినప్పటికీ దేశవ్యాప్తంగా కార్మికులు స్వచ్ఛందంగా పోరాటాలకు దిగుతున్నారని పేర్కొన్నారు. లేబర్ కోడ్స్ను తక్షణమే రద్దు చేయకపోతే భవిష్యత్తులో ఉద్యమాలను మరింత ఉధృతం చేస్తామని హెచ్చరించారు.
ఇప్పటికే 11వ పీఆర్సీ అమలు, మహిళా ఉద్యోగులకు ప్రత్యేక హక్కులు, డీఏ, రిటైర్మెంట్ బెనిఫిట్స్ వంటి అంశాలు అమలు కావడం లేదని ఆవేదన వ్యక్తం చేశారు. మరోవైపు పెట్రోల్, డీజిల్ ధరలు పెరుగుతుండగా, నిత్యావసర సరుకుల ధరలు ఆకాశాన్నంటుతున్నాయని, నిరుద్యోగం పెరుగుతోందని తెలిపారు.
దేశ సంపదను ప్రైవేట్ కంపెనీలకు అప్పగిస్తూ బడా పెట్టుబడిదారులకు లాభాలు చేకూర్చే విధానాలను ప్రభుత్వం కొనసాగిస్తోందని ఆరోపించారు. కార్మికుల సమస్యలను వెంటనే పరిష్కరించి, లేబర్ కోడ్స్ను రద్దు చేయాలని ప్రభుత్వాన్ని కోరారు.
ఈ కార్యక్రమంలో ఎల్ఐసి ఉద్యోగులు, వివిధ కార్మిక సంఘాల నాయకులు, కార్యకర్తలు పెద్ద సంఖ్యలో పాల్గొన్నారు.
.png)
