నూజివీడు, పశ్చిమ వాహిని, ఏప్రిల్ 23: ఏలూరు జిల్లా ఎస్పీ శ్రీ కె. ప్రతాప్ శివకిషోర్ ఐపీఎస్ మార్గదర్శకత్వంలో, నూజివీడు డీఎస్పీ శ్రీ కె.వి.వి.ఎన్.వి. ప్రసాద్ ఆదేశాల మేరకు నూజివీడు త్రివిధ స్కూల్లో విద్యార్థులకు అవగాహన కార్యక్రమం నిర్వహించారు. నూజివీడు రూరల్ సీఐ కె. రామకృష్ణ ఆధ్వర్యంలో జరిగిన ఈ కార్యక్రమంలో సైబర్ నేరాలు, పోక్సో చట్టం, మాదకద్రవ్యాల వినియోగం వల్ల కలిగే దుష్పరిణామాలపై వివరించారు. విద్యార్థులు భద్రతా అంశాలపై జాగ్రత్తగా ఉండాల్సిన అవసరాన్ని పోలీసులు గుర్తుచేశారు.
ఈ సందర్భంగా సీఐ రామకృష్ణ మాట్లాడుతూ మహిళలు, మైనర్ బాలికల రక్షణ కోసం ఆంధ్రప్రదేశ్ ప్రభుత్వం ఏర్పాటు చేసిన శక్తి టీమ్ నిరంతరం పనిచేస్తోందని తెలిపారు. మాదకద్రవ్యాల వినియోగం, రవాణా, విక్రయం వంటి చర్యలకు పాల్పడితే కఠిన చట్టపరమైన చర్యలు తీసుకుంటామని హెచ్చరించారు. యువత ఇటువంటి అలవాట్లకు దూరంగా ఉండాలని సూచించారు.
సోషల్ మీడియా వినియోగంలో విద్యార్థులు జాగ్రత్తగా ఉండాలని పోలీసులు సూచించారు. ఫేస్బుక్, ట్విట్టర్, జీమెయిల్ వంటి వేదికలను అవసరానికి మాత్రమే వినియోగించాలని, వ్యక్తిగత వివరాలు, ఫోటోలు అనవసరంగా షేర్ చేయవద్దని తెలిపారు. అపరిచితుల నుండి వచ్చే లింకులు, మెసేజ్లు, యాప్లను ఓపెన్ చేయడం ద్వారా గోప్య సమాచారం దొంగిలించబడే ప్రమాదం ఉందని హెచ్చరించారు.
అదేవిధంగా బ్యాంక్ అధికారులు అంటూ ఓటీపీ కోరే మోసగాళ్లపై అప్రమత్తంగా ఉండాలని సూచించారు. ఎలాంటి పరిస్థితుల్లోనూ ఓటీపీ వివరాలు పంచుకోవద్దని, సందేహాస్పద కాల్స్ లేదా మెసేజ్లు వచ్చినప్పుడు అధికారిక సమాచారం ధృవీకరించుకోవాలని పేర్కొన్నారు. సైబర్ నేరాల నివారణలో ప్రతి ఒక్కరి జాగ్రత్త ఎంతో ముఖ్యమని తెలిపారు.
విద్యార్థులు తమ చుట్టూ జరుగుతున్న అన్యాయాలు, అసాంఘిక కార్యకలాపాలపై వెంటనే పోలీసులకు సమాచారం అందించాలని సూచించారు. డయల్ 112 ద్వారా సమాచారం ఇచ్చిన వారి వివరాలు గోప్యంగా ఉంచుతామని భరోసా ఇచ్చారు. ఈ కార్యక్రమంలో త్రివిధ స్కూల్ ప్రధానోపాధ్యాయులు, ఉపాధ్యాయులు, విద్యార్థులు పాల్గొన్నారు.
_11zon.png)
