ఏలూరు, పశ్చిమ వాహిని, ఏప్రిల్, 04: జిల్లాలో పోలీసు వ్యవస్థను మరింత బలోపేతం చేసే దిశగా కీలక కార్యక్రమం నిర్వహించబడింది. జిల్లా ఇంచార్జ్ మంత్రి నాదెండ్ల మనోహర్ మరియు రాష్ట్ర గృహనిర్మాణ శాఖ మంత్రి కొలుసు పార్థసారథి సమక్షంలో దాతల సహకారంతో కొనుగోలు చేసిన 6 జీప్ వాహనాలను పోలీసు శాఖకు అందజేశారు. ఉంగుటూరు ఎమ్మెల్యే పత్సమట్ల ధర్మరాజు, చింతలపూడి ఎమ్మెల్యే సొంగా రోషన్ కుమార్ సహకారంతో ఒక్కొక్కటి రూ.10 లక్షల విలువ గల ఈ వాహనాలను రూ.60 లక్షల వ్యయంతో సమకూర్చారు.
ఈ వాహనాలను నిడమర్రు సర్కిల్ పరిధిలోని గణపవరం, నిడమర్రు, చేబ్రోలు, భీమడోలు మరియు చింతలపూడి పోలీస్ స్టేషన్లకు పంపిణీ చేశారు. ప్రజల సహకారంతో పోలీసు శాఖకు అవసరమైన వనరులు సమకూర్చడం ఆదర్శప్రాయమని అధికారులు పేర్కొన్నారు. ఈ కార్యక్రమానికి ఏలూరు రేంజ్ ఐజీ జి.వి.జి. అశోక్ కుమార్, జిల్లా కలెక్టర్ కె. వెట్రిసెల్వి, జిల్లా ఎస్పీ కె. ప్రతాప్ శివకిషోర్ తదితరులు హాజరయ్యారు.
మంత్రి కొలుసు పార్థసారథి మాట్లాడుతూ, ఏలూరు జిల్లాలో పోలీసులు అత్యంత నిబద్ధతతో విధులు నిర్వహిస్తున్నారని ప్రశంసించారు. నూజివీడు ప్రాంతంలో జరిగిన దొంగతనాల కేసులను ఆధునిక సాంకేతికతతో వేగంగా ఛేదించడం పోలీసుల సామర్థ్యానికి నిదర్శనమని అన్నారు. లక్నో వరకు వెళ్లి నిందితులను పట్టుకోవడం పోలీసు శాఖ ప్రతిభను ప్రతిబింబిస్తుందని పేర్కొన్నారు.
ఇంచార్జ్ మంత్రి నాదెండ్ల మనోహర్ మాట్లాడుతూ, రాష్ట్రంలో శాంతిభద్రతల పరిరక్షణకు ప్రభుత్వం ప్రత్యేక ప్రాధాన్యం ఇస్తోందన్నారు. ప్రతి సంవత్సరం పోలీసు వాహనాల కొనుగోలుకు రూ.100 కోట్లు కేటాయిస్తూ నేరస్థలాలకు త్వరితగతిన చేరుకునేలా చర్యలు తీసుకుంటున్నామని తెలిపారు. ఈ వాహనాలు పోలీసు సేవలను మరింత వేగవంతం చేస్తాయని అన్నారు.
ఏలూరు రేంజ్ ఐజీ మరియు జిల్లా ఎస్పీలు మాట్లాడుతూ, దాతల సహకారంతో ఇప్పటివరకు జిల్లాలో 19 వాహనాలు పోలీసు శాఖకు అందినట్లు తెలిపారు. తాజా వాహనాలతో పోలీసుల పనితీరు మరింత మెరుగవుతుందని, ప్రజల భద్రతకు ఇవి ఎంతో ఉపయోగపడతాయని చెప్పారు. ఈ కార్యక్రమంలో పలువురు ఉన్నతాధికారులు, పోలీసు సిబ్బంది పాల్గొన్నారు.
