ఏలూరు, జూన్ 12: ప్రభుత్వ పాఠశాలల్లో రూపాయి ఖర్చు లేకుండా నాణ్యమైన విద్య అందిస్తున్న విషయాన్ని ప్రజలకు విస్తృతంగా తెలియజేసి, విద్యార్థుల ప్రవేశాలు మరింత పెరిగేలా చర్యలు చేపట్టాలని జిల్లా కలెక్టర్ K. Vetriselvi కె. వెట్రిసెల్వి అధికారులను ఆదేశించారు. పాఠశాలల పునఃప్రారంభం సందర్భంగా శుక్రవారం ఏలూరు నగరంలోని 23వ డివిజన్లో ఉన్న నగరపాలక సంస్థ ప్రాథమిక పాఠశాలను కలెక్టర్ ఆకస్మికంగా తనిఖీ చేశారు.
ఈ సందర్భంగా ప్రైవేట్ పాఠశాలల నుంచి నగరపాలక సంస్థ ప్రాథమిక పాఠశాలలో ప్రవేశం పొందిన ఎనిమిది మంది విద్యార్థులను కలెక్టర్ అభినందించారు. వారికి పాఠ్యపుస్తకాలు, విద్యా కిట్లను అందజేసి ప్రోత్సహించారు. అనంతరం విద్యార్థులు, ఉపాధ్యాయులతో మాట్లాడి విద్యా ప్రమాణాలు, పాఠశాల నిర్వహణపై వివరాలు తెలుసుకున్నారు.
కలెక్టర్ మాట్లాడుతూ రాష్ట్ర ప్రభుత్వం విద్యాభివృద్ధికి అత్యంత ప్రాధాన్యత ఇస్తోందన్నారు. ప్రభుత్వ పాఠశాలల్లో విద్యా ప్రమాణాలను మెరుగుపరచేందుకు ఖాళీగా ఉన్న ఉపాధ్యాయ పోస్టులను ఇటీవల డీఎస్సీ ద్వారా భర్తీ చేసినట్లు తెలిపారు. అలాగే ‘తల్లికి వందనం’ పథకం ద్వారా విద్యార్థుల తల్లులకు ఆర్థిక సహాయం అందించడంతో పాటు, పాఠ్యపుస్తకాలు, నోట్బుక్స్, బ్యాగులు, యూనిఫాంలు, షూలను ఉచితంగా అందిస్తున్నామని పేర్కొన్నారు. మధ్యాహ్న భోజన పథకం ద్వారా విద్యార్థులకు పౌష్టికాహారం అందిస్తున్నట్లు తెలిపారు.
ప్రైవేట్ పాఠశాలల నుంచి ప్రభుత్వ పాఠశాలలకు విద్యార్థులు మారడం శుభపరిణామమని కలెక్టర్ అభివర్ణించారు. ప్రభుత్వ పాఠశాలల్లో అందిస్తున్న సౌకర్యాలు, నాణ్యమైన విద్యపై ముఖ్యంగా పేద కుటుంబాలకు అవగాహన కల్పించాలని విద్యాశాఖ అధికారులను ఆదేశించారు. తద్వారా ప్రభుత్వ పాఠశాలల్లో ప్రవేశాలు మరింత పెరిగేలా కృషి చేయాలని సూచించారు.
పాఠశాలల్లో మౌలిక సదుపాయాలకు ఎటువంటి కొరత లేకుండా చూడాలని, రక్షిత తాగునీటి సదుపాయం కల్పించాలని, పరిసరాలను పరిశుభ్రంగా ఉంచాలని కలెక్టర్ అధికారులకు సూచించారు. విద్యార్థులు విద్యతో పాటు క్రీడలకు కూడా ప్రాధాన్యత ఇచ్చేలా ప్రోత్సహించాలని ఆదేశించారు. ఈ కార్యక్రమంలో జిల్లా విద్యాశాఖాధికారి వెంకటలక్ష్మమ్మ, ఐసీడీఎస్ పీడీ శారద, ఏలూరు తహసీల్దార్ గాయత్రీదేవి, పురపాలక శాఖ సిబ్బంది తదితరులు పాల్గొన్నారు. పాఠశాలలోని సౌకర్యాలను కలెక్టర్ అధికారులతో కలిసి పరిశీలించారు.
.jpg)
_11zon.png)
