పుంత రోడ్డుపై ఆక్రమణలు.. రైతుల ఆందోళన

టి.నరసాపురం, పశ్చిమ వాహిని: తిరుమల దేవస్థానం గ్రామ పంచాయతీ పరిధిలోని మల్లపు గూడెం సమీపంలో ఉన్న “ద్వారవాకుల పుంత” రోడ్డుపై ఆక్రమణలు పెరుగుతున్నాయని గ్రామస్థులు ఆవేదన వ్యక్తం చేస్తున్నారు. సుమారు 150 నుంచి 200 ఎకరాల సాగుభూములకు ఈ రహదారి ప్రధాన మార్గంగా ఉపయోగపడుతోంది. అయితే కొందరు వ్యక్తులు పుంత భాగాలను ఆక్రమించడంతో రహదారి కుంచించుకుపోయి వాహనాల రాకపోకలకు తీవ్ర అంతరాయం కలుగుతోందని రైతులు చెబుతున్నారు.

కుదించుకుపోయిన మార్గం

ఈ రహదారిద్వారా ప్రతిరోజూ ఆయిల్ పామ్, వరి, మక్కజొన్న తదితర పంటలను సాగు చేసే రైతులు, కూలీలు రాకపోకలు సాగిస్తున్నారు. గతంలో రెండు ట్రాక్టర్లు ఎదురెదురుగా సులభంగా వెళ్లగలిగేంత వెడల్పు ఉన్న ఈ మార్గం ప్రస్తుతం చాలా ఇరుకుగా మారిందని తెలిపారు. కొందరు వ్యక్తులు పుంత ప్రాంతంలో చెట్లు నాటి, కంచెలు వేసి రహదారి భాగాన్ని స్వాధీనం చేసుకున్నారని ఆరోపిస్తున్నారు. దీంతో వ్యవసాయ వాహనాలు కూడా సరిగా వెళ్లలేని పరిస్థితి ఏర్పడింది.

చిన్న రైతులపై తీవ్ర ప్రభావం

ఈ ప్రాంతంలో రెండు నుంచి మూడు ఎకరాల చొప్పున చిన్న, సన్నకారు రైతులు, దళితులు, గిరిజనులు, బలహీన వర్గాలకు చెందిన కుటుంబాలు సాగు చేస్తున్నారు. పంటలను మార్కెట్‌కు తరలించే సమయంలో తీవ్ర ఇబ్బందులు ఎదురవుతున్నాయని వారు వాపోతున్నారు. ముఖ్యంగా వర్షాకాలంలో రహదారి మరింత దెబ్బతిని బురదమయంగా మారడంతో పరిస్థితి మరింత దయనీయంగా మారుతోందని తెలిపారు.

చర్యలు తీసుకోవాలంటూ విజ్ఞప్తి

రెవెన్యూ, పంచాయతీ అధికారులు తక్షణమే స్పందించి ఆక్రమణలను తొలగించాలని రైతులు డిమాండ్ చేస్తున్నారు. పూర్తి స్థాయి సర్వే నిర్వహించి రహదారిని పునరుద్ధరించి శాశ్వత పరిష్కారం చూపాలని కోరుతున్నారు. సమస్యను పట్టించుకోకపోతే భవిష్యత్తులో ఆందోళన కార్యక్రమాలు చేపట్టాల్సి వస్తుందని హెచ్చరిస్తున్నారు.

రైతుల ఇబ్బందులను దృష్టిలో ఉంచుకుని సంబంధిత అధికారులు వెంటనే చర్యలు తీసుకోవాలని గ్రామస్థులు విజ్ఞప్తి చేస్తున్నారు.