ఏలూరు, పశ్చిమ వాహిని, మే 6: శాంతి భద్రతల పరిరక్షణలో భాగంగా సాంకేతికతను వినియోగించుకోవాలని, ప్రతి పౌరుడు చట్టాలపై అవగాహన కలిగి ఉండాలని భీమడోలు ఎస్ఐ షేక్ మదీనా బాషా ప్రజలకు సూచించారు. ఏలూరు డీఎస్పీ డి. శ్రావణ్ కుమార్ ఆదేశాల మేరకు భీమడోలు మండలం కూరెళ్ళగూడెం గ్రామంలో గ్రామ పెద్దలు మరియు ప్రజల సహకారంతో ఏర్పాటు చేసిన సీసీ కెమెరాలను ఎస్ఐ మదీనా బాషా ప్రారంభించారు. అనంతరం గ్రామంలో అవగాహన సదస్సు నిర్వహించి పలు కీలక అంశాలపై ప్రజలకు సూచనలు చేశారు.
ఈ సందర్భంగా పోలీసులు మాట్లాడుతూ గ్రామాల్లో నేరాల నియంత్రణకు, దొంగతనాల నివారణకు సీసీ కెమెరాలు “మూడవ కన్ను”లా పనిచేస్తాయని తెలిపారు. గ్రామ భద్రత కోసం ముందుకొచ్చిన గ్రామస్తులను అభినందించారు. సాంకేతిక పరిజ్ఞానాన్ని ఉపయోగించుకుని నేరాలను అరికట్టడంలో ప్రజలు కూడా భాగస్వాములు కావాలని కోరారు.
సైబర్ నేరాలపై ప్రత్యేక అవగాహన కల్పిస్తూ తెలియని వ్యక్తులకు ఓటీపీలు చెప్పవద్దని హెచ్చరించారు. ఆన్లైన్ మోసాలకు గురైతే వెంటనే 1930 హెల్ప్లైన్కు ఫిర్యాదు చేయాలని సూచించారు. సామాజిక మాధ్యమాల్లో వచ్చే అసత్య ప్రచారాలను నమ్మవద్దని, వ్యక్తిగత వివరాలను పంచుకోవడంలో అప్రమత్తంగా ఉండాలని తెలిపారు.
బాల్య వివాహాలు చట్టరీత్యా నేరమని, అలాంటి ఘటనలు తెలిసిన వెంటనే పోలీసులకు సమాచారం ఇవ్వాలని కోరారు. చిన్నారులపై లైంగిక వేధింపుల నిరోధక చట్టం (POCSO)పై అవగాహన కల్పిస్తూ బాధితులకు చట్టం కల్పించే రక్షణను వివరించారు. అత్యవసర పరిస్థితుల్లో మహిళలు, వృద్ధులు, చిన్నారులు తక్షణ సహాయం కోసం 112 నెంబర్ను సంప్రదించాలని సూచించారు.
రోడ్డు భద్రతపై మాట్లాడుతూ ద్విచక్ర వాహనదారులు తప్పనిసరిగా హెల్మెట్ ధరించాలని, మైనర్లకు వాహనాలు ఇవ్వవద్దని తల్లిదండ్రులను హెచ్చరించారు. ప్రస్తుతం వేసవి కాలం కావడంతో పిల్లల భద్రతపై ప్రత్యేక జాగ్రత్తలు తీసుకోవాలని తెలిపారు. చెరువులు, కాలువలు, నదుల వద్ద పిల్లలను ఒంటరిగా పంపవద్దని, మధ్యాహ్న వేళల్లో ఎండ తీవ్రత ఎక్కువగా ఉండటంతో పిల్లలను బయటకు పంపకుండా జాగ్రత్తలు తీసుకోవాలని సూచించారు.
సెలవుల్లో పిల్లలు ఎవరితో తిరుగుతున్నారు, ఏ ఆటలు ఆడుతున్నారు అనే విషయాలను తల్లిదండ్రులు గమనించాలని పోలీసులు సూచించారు. ఈ కార్యక్రమంలో కూరెళ్ళగూడెం గ్రామ పెద్దలు, యువత, మహిళలు మరియు భీమడోలు పోలీస్ స్టేషన్ సిబ్బంది పెద్ద సంఖ్యలో పాల్గొన్నారు.
_11zon.png)
