ANDRAPRADESH, AMRAVATHI: ఆంధ్రప్రదేశ్‌లో ప్రభుత్వ, ఎయిడెడ్‌ పాఠశాలల్లో చదివే విద్యార్థులకు.. వచ్చే విద్యా సంవత్సరానికి సంబంధించి.. 'సర్వేపల్లి రాధాకృష్ణన్‌ విద్యార్థి మిత్ర' కిట్లు అందించేందుకు ప్రభుత్వం సన్నద్ధమవుతోంది. వచ్చే విద్యా సంవత్సరంలో సకాలంలో విద్యార్థులకు ఈ కిట్లను అందించేందుకు నవంబర్ నుంచే ప్రణాళికలు మొదలుపెట్టింది. డిసెంబర్‌లో టెండర్లు పిలిచి, జనవరిలో వాటిని ఖరారు చేయనున్నారు. ఫిబ్రవరిలో నాణ్యత పరిశీలన, మేలో జిల్లాలకు, మండలాలకు చేరవేసి, జూన్ 12న విద్యార్థులకు అందజేయాలని లక్ష్యంగా పెట్టుకుంది.
ఆంధ్రప్రదేశ్‌లో అధికారంలో ఉన్న కూటమి ప్రభుత్వం.. రాష్ట్రంలోని ప్రభుత్వ, ఎయిడెడ్‌ పాఠశాలల్లో చదివే విద్యార్థులకు 'సర్వేపల్లి రాధాకృష్ణన్‌ విద్యార్థి మిత్ర' కిట్లు అందిస్తోన్న సంగతి తెలిసిందే. ఈ కిట్లలో క్లాస్ బుక్స్, 2 జతల యూనిఫాంలు, బూట్లు, 2 జతల సాక్సులు, బెల్టు, నోట్‌బుక్‌లు ఉంటాయి. వచ్చే విద్యా సంవత్సరానికి గాను ఈ కిట్లను సకాలంలో విద్యార్థులకు అందజేయడానికి ప్రభుత్వం ఇప్పటి నుంచే ప్రణాళిలకలు రెడీ చేస్తోంది. దీనిలో భాగంగా సమగ్ర శిక్షా అభియాన్‌ ప్రాజెక్టు డైరెక్టర్‌కు ప్రభుత్వం ఒక టైంలైన్‌ను నిర్దేశించింది.
కిట్ల పంపిణీలో భాగంగా నవంబరులో అనుమతులు, కమిటీ ఏర్పాటు చేయాలని.. ఆ తర్వాత డిసెంబరులో టెండర్ల ప్రకటన ఇవ్వాలని ఆదేశాలు జారీ చేసింది. అలానే జనవరిలో టెండర్లను ఖరారు చేయాలని.. ఫిబ్రవరిలో వాటి నాణ్యతను పరిశీలించాలని సూచించింది. ఆ తర్వాత మే నెలలో కిట్లను జిల్లాలకు, మండలాలకు చేర్చాలని.. అనంతరం జూన్‌లో పాఠశాలలకు సరఫరా చేయాలని తెలిపింది. ఎట్టి పరిస్థితుల్లో జూన్ 12న విద్యార్థులకు ఈ కిట్లు అందజేయాలని ప్రభుత్వం లక్ష్యంగా పెట్టుకుంది.
ఈ కిట్ల సేకరణ ప్రక్రియను వేగవంతం చేయడానికి ప్రభుత్వం కట్టుదిట్టమైన ప్రణాళికను రూపొందించింది. పరిపాలన, ఆర్థిక అనుమతులు, టెక్నికల్, ఉన్నతస్థాయి కమిటీ ఏర్పాటు వంటి పనులను నవంబర్ నెలలోనే పూర్తి చేయాలని ప్రభుత్వం స్పష్టం చేసింది. ఆ తర్వాత డిసెంబరు తొలి వారంలో టెండర్ డాక్యుమెంట్‌ను సిద్ధం చేయాలని.. రెండో వారంలో టెండర్లకు సంబంధించిన ప్రకటన విడుదల చేయాలని సూచించింది. జనవరి చివరి వారంలో టెండర్లను ఖరారు చేయాలని తెలిపింది. ఫిబ్రవరి రెండో వారంలో మూడు దశల్లో నమూనాల నాణ్యతను, నిర్ధారణను చేపట్టాలని పేర్కొంది.
ఈ కిట్లను పాఠశాల ప్రారంభించిన మొదటి రోజే విద్యార్థులకు అందించడం కోసం ప్రభుత్వం ఒక స్పష్టమైన షెడ్యూల్‌ను అనుసరిస్తోంది. మే నెలలో జిల్లా, మండల స్టాక్‌ పాయింట్లకు కిట్లకు సంబంధించిన సామాగ్రిని చేర్చాలని, నాలుగో వారంలో మండల స్టాక్‌ పాయింట్లలో కిట్ల తయారీని పూర్తి చేయాలని సూచించింది. జూన్ మొదటి వారంలో మండలాల నుంచి పాఠశాలలకు సరఫరా చేసి, జూన్ 12న విద్యార్థులకు ఈ కిట్లను అందజేయాలని ఆదేశించింది. ఈ కిట్లలో విద్యార్థులకు అవసరమైన అన్ని వస్తువులు ఉండేలా ప్రభుత్వం జాగ్రత్త తీసుకుంటోంది.
.jpg)
