ANDRAPRADESH: మాజీ మంత్రి, వైసీపీ నేత కాకాణి గోవర్ధన్ రెడ్డిని పోలీసులు అదుపులోకి తీసుకున్నట్లు తెలుస్తోంది. BY: PASCHIMA VAHINI కేరళలో ఉన్న కాకాణి గోవర్ధన్ రెడ్డిని ఏపీ పోలీసులు ఆదివారం అదుపులోకి తీసుకున్నట్లు సమాచారం. క్వార్ట్జ్ అక్రమ తవ్వకాలు, రవాణా ఆరోపణలతో పాటుగా నిబంధనలకు విరుద్ధంగా పేలుడు పదార్థాలు వాడారంటూ ఆయనపై ఆరోపణలు ఉన్నాయి. ఈ మేరకు నెల్లూరు జిల్లా పొదలకూరు పోలీస్ స్టేషన్‌లో ఫిబ్రవరిలో కేసు నమోదైంది. అయితే గత కొంతకాలంగా కాకాణి గోవర్ధన్ రెడ్డి అజ్ఞాతంలో ఉన్నట్లు తెలుస్తోంది. ముందస్తు బెయిల్ కోరుతూ కాకాణి గోవర్ధన్ రెడ్డి సుప్రీంకోర్టును ఆశ్రయించగా.. సుప్రీంకోర్టు కాకాణి బెయిల్ పిటిషన్ తిరస్కరించింది. దీంతో అప్పటి నుంచి కాకాణిని పోలీసులు అరెస్ట్ చేసే అవకాశం ఉందంటూ వార్తలు వచ్చాయి. ఈ క్రమంలోనే ఆదివారం కేరళలో కాకాణి గోవర్ధన్ రెడ్డిని ఏపీ పోలీసులు అదుపులోకి తీసుకున్నట్లు తెలిసింది. సోమవారం నెల్లూరుకు తీసుకువచ్చే అవకాశాలు ఉన్నాయి.
మరోవైపు అక్రమ మైనింగ్ కేసులో కాకాణి గోవర్ధన్ రెడ్డి ఏ4 నిందితుడిగా ఉన్నారు. ఈ కేసులో కాకాణి గోవర్ధన్ రెడ్డికి విచారణకు రావాలంటూ పోలీసులు పలుమార్లు నోటీసులు కూడా జారీ చేశారు. అయితే కాకాణి విచారణకు హాజరుకాలేదు. పైగా ఆయన అజ్ఞాతంలోకి వెళ్లారనే వార్తలు వచ్చాయి. ఈ క్రమంలోనే ఆదివారం ఏపీ పోలీసులు కాకాణిని కేరళలో అదుపులోకి తీసుకున్నారని ప్రచారం.
అసలేంటీ ఆరోపణలు..
వైసీపీ ప్రభుత్వ హయాంలో250 కోట్ల రూపాయల విలువైన క్వార్ట్జ్ ఖనిజాన్ని అక్రమంగా రవాణా చేశారని అప్పట్లో వివాదం చెలరేగింది. గని లీజు కాలం ముగిసిన తర్వాత కూడా వైసీపీ నేతలు ఆక్రమించుకుని.. మైనింగ్ చేశారని ఆరోపణలొచ్చాయి. అంతేగాకుండా రాళ్ళను పేల్చేందుకు నిబంధనలకు విరుద్ధంగా పెద్దఎత్తున పేలుడు పదార్థాలను నిల్వ చేసి ఉపయోగించారని ఆరోపణలు వచ్చాయి. దీంతో ఫిబ్రవరి 16న మాజీ మంత్రి కాకాణి గోవర్ధన్ రెడ్డి సహా పలువురిపై కేసులు నమోదయ్యాయి. ఇందులో కాకాణి గోవర్ధన్ రెడ్డిని ఏ4గా చేరుస్తూ విచారణకు రావాలంటూ పోలీసులు మూడుసార్లు నోటీసులు ఇచ్చారు. నెల్లూరు సహా హైదరాబాద్‌లోని కాకాణి గోవర్ధన్ రెడ్డి ఇళ్లకు వెళ్లి మరీ నోటీసులు ఇచ్చారు. అయితే మూడుసార్లు నోటీసులిచ్చినా కాకాణి గోవర్ధన్ రెడ్డి విచారణకు హాజరుకాలేదు. అప్పట్నుంచి అజ్ఞాతంలో ఉన్న కాకాణిని తాజాగా పోలీసులు అరెస్ట్ చేసినట్లు సమాచారం.
.jpg)
