విజయవాడ: రామోజీ గ్రూప్ ఆధ్వర్యంలో రెండో విడత రామోజీ ఎక్సలెన్స్ అవార్డ్స్ ప్రదానోత్సవాన్ని ఈ నెల 16వ తేదీన విజయవాడలో ఘనంగా నిర్వహించనున్నారు. సమాజానికి విశేష సేవలు అందిస్తూ, తమ తమ రంగాల్లో అసాధారణ ప్రతిభను కనబరిచిన వ్యక్తులను గుర్తించి గౌరవించాలనే లక్ష్యంతో ఈ అవార్డుల కార్యక్రమాన్ని ఏర్పాటు చేస్తున్నారు.
ఈ కార్యక్రమానికి కేంద్ర హోంమంత్రి అమిత్ షా ముఖ్య అతిథిగా హాజరుకానున్నారు. ఆంధ్రప్రదేశ్ రాష్ట్ర గవర్నర్ సయ్యద్ అబ్దుల్ నజీర్, ముఖ్యమంత్రి నారా చంద్రబాబు నాయుడు, ఉప ముఖ్యమంత్రి కొణిదెల పవన్ కళ్యాణ్ గౌరవ అతిథులుగా పాల్గొననున్నారు. ప్రముఖుల సమక్షంలో వివిధ రంగాలకు చెందిన ప్రతిభావంతులకు అవార్డులు ప్రదానం చేయనున్నారు.
నవంబర్ 16వ తేదీ సోమవారం సాయంత్రం 5.30 గంటల నుంచి రాత్రి 8 గంటల వరకు విజయవాడలోని డాక్టర్ బి.ఆర్. అంబేద్కర్ కళావేదికలో ఈ కార్యక్రమం జరగనుంది. రామోజీరావు జన్మదిన వార్షికోత్సవాన్ని పురస్కరించుకుని ఈ ప్రత్యేక కార్యక్రమాన్ని నిర్వహిస్తున్నట్లు ఆహ్వాన పత్రికలో పేర్కొన్నారు.
రామోజీ గ్రూప్ ఛైర్మన్ అండ్ మేనేజింగ్ డైరెక్టర్ సీహెచ్ కిరణ్ పేరుతో ప్రముఖులకు ఆహ్వానాలు పంపించారు. కార్యక్రమానికి హాజరయ్యే అతిథుల కోసం అనంతరం విందు ఏర్పాటు చేయనున్నట్లు నిర్వాహకులు తెలిపారు. పరిమిత సీటింగ్ సదుపాయం దృష్ట్యా ఒక్కో ఆహ్వానం ఒక అతిథికి మాత్రమే చెల్లుబాటు అవుతుందని ఆహ్వాన పత్రికలో స్పష్టం చేశారు.
కేంద్ర హోంమంత్రి అమిత్ షా విజయవాడ పర్యటన నేపథ్యంలో సంబంధిత కేంద్ర, రాష్ట్ర భద్రతా విభాగాలు సమన్వయంతో అవసరమైన ఏర్పాట్లు చేపడుతున్నాయి. ఒకే వేదికపై కేంద్ర, రాష్ట్ర స్థాయి ప్రముఖులు పాల్గొననున్న ఈ అవార్డుల ప్రదానోత్సవంపై రాజకీయ, సామాజిక, మీడియా వర్గాల్లో ఆసక్తి నెలకొంది.
.png)
